Pu David Zohmangaiha, Republic Veng leh Pu Vanlalliana, Maubawk te chu tunah hian khawvela tlang sang ber Mt. Everest-ah an thang mek a, lawnchhuah ngei an tum.

1st North East India on Top of the World Mt. Everest Expedition 2013 hi North Eastern Council (NEC)-in a sponsor a ni a. Planning Department, Manipur ten an organised a, a implementation erawh Manipur Mountaineering & Trekking Association (MMTA) ten an bultum a, Organising Committee-ah hian Pu Zodintluanga, Minister, Sports & Youth pawh a tel a ni.

He expedition-ah hian mi 17 an kal a, chung zingah chuan Mizote kan duai lo hle. Pu David Zohmangaiha hi Documentation Secretary a ni a, ani hian reading pawimawh an neih zawng zawng a chhinchhiah a; Pu Vanlalliana hi Base Camp Manager a ni thung a, ani erawh hi chuan Base Camp lama buaipui ngai zawng zawngte a buaipui a ni. Mi 14 climber an ni a, mi 3 Base Camp-ah an awm.

March 20 khan India President, Pranab Mukherjee chuan a chenna Rashtrapati Bhavan-ah flag-off ceremony neihpuiin, duhsakna a hlan a ni.

Mt. Everest Base Camp hi March 2 khan an thleng a, Base Camp dawtah Camp 1, Camp 2, Camp 3, Camp 4 leh Summit (a tlang chhip) te a awm a ni. Base camp-ah hian awmhmun khuarin camp dangah an han lawn thin a, camp dangah hian an han kal chhin fo thin a ni. Camp hrang hrangah te hian an riak lut ngawt ngai lova, an taksa a in-adapt theih nan vawi thum/li laite an kalchhin thin. Base camp-ah hian ei leh inturte pawh a awm tha a, internet pawh an hmang zau zauh thei a (connectivity erawh duhthusam an nei lovang tih a chiang hle).

He expedition team hian Camp 3 an thleng chho tawh a; climber 6 chauhin an thleng chho thei a, heng zingah hian Pu Zohmaa pawh hi a tel a ni. An tum dan chuan May 13 hian Camp 4 thlen chhoh an tum a, chumi zan dar 10 velah Summit lam pan an tum a ni. An tluan chuan a tuk, May 14 zing dar 7 velah hian a tlang chhip an thlen theih an inring. Mahse tunah hian thlipui nasa tak a tleh dawna an hriat avangin kawng hi an khar leh rih dawn a, an hma lam hun tur sawi a harsa ta hle. Chuvangin, May 17 velah hian Summit lawn turin Camp 4-ah riah chhoh an tum a ni.

Tawngtaipui an ngai e:
Pu David Zohmangaiha hi a thlalak atanga en pawh hian a chau tawh dawn tih a chiang hle a, a hmai a ung (dum) nasa tawh hle a. A kutte pawh a thi nasa tawh hle a ni. Vawi tam tak a inchhir tawh ni awmin a insawi a; mahse hlawhchham erawh a tum lo hle (adventure lam buaipui chuan hei hi an hrethiam hlein ka ring). Pu Vanlalliana hi a pa damlohna avangin haw te pawh a tum rum rum a; mahse tun thlengin a la cham ta rih zel a ni. Hetiang a nih avang hian Mizo mipuiten kan tawngtaipui an ngai nasa hle.

Note: Pu David Zohmangaiha hi ka patea a ni a, thlalakte pawh a profile atanga ka lak a ni. President in kawt a mi erawh e-pao.net a mi a ni thung. Pu Vanlalliana thlalak hi President in kawt lo a mi khi ka hmu lo tlat a, pawi ka ti hle. President hnunga ding pahnihte khi kan Mizopate chu an ni.

Image Credit: David Zohmangaiha & e-pao.net.

Rajiv Gandhi Stadium (Mualpui) hi tun dinhmunah chuan an la veng uluk hle a. Hei vang hian bawlhhlawh paih mai mai pawh hmuh tur a vang hle. Hetiang zel hian enkawl thei se a duhawm khawp mai.

Ka pi (ka nu nu), Vanlalrawni (Kum 88)-in min boral san kum khatna a lo ni ve leh ta der mai. Ka pi hi 7 July 1924-ah Baktawngah a piang a. Ka pu, R. Thansangan 30 January 1999 khan a boral san a. Chumi hnuah chuan a khua a har thei hle.

Hun rei tak min dampui avangin a tu leh fate kan lawm hle a ni. Mangtha le, ka pi.

Easter Sunday Sunrise Service 2013 chu kan tum loh dan deuhin kan hman a tul tlat. Nizanah veng chhungah vanduai thlak takin mitthi pahnih kan nei hlauh a, mitthi pakhat zawk phei chu kan kohhran khuangpu hlun leh a fate pawh KTP-a mi tangkai tak tak an nih avangin kan rilru a khingbai hle.

Zing dar 5:30-ah kan biak-in chhip tual zawlah sunrise service kan hmang tan a. Member erawh duh thusamin kan tam lo hle. Programme sei tak hman a ni lem lo va, hruaituin Bible chhiarna a nei hnuah hla kan saho a. Chumi zawhah kan Branch KTP leader-in thuchah tawi a sawi a, kan bang zui nghal.

Inkhawm banah thingpui leh easter egg eiho a ni a; mahse ka ei ve ta lo, ka pum ka ngaihtuah, haha.

Good Friday Zamuang lamah hman theihna hun remchang ka nei a, ka la kal ngai lohna a nih avangin ka lawm hle.

Zamuangah hian ka u (leh a nupui) Pastor-in tun kum 2013 tantirh atang khan a awm a. Induction programme-ah ka kal ve hman loh avangin “Remchang hmasa berah ka kal ve ang” ka tih chu hun remchang ka nei thei ta hlauh a, a nuam ka ti hle.

Venpui zan (Good Friday hma zan)-ah ka uin Zamuang Kohhranah Lalpa zanriah sacrament a buatsaih a. A tukah a bial fannaah ka zui ve leh a. Good Friday chawhma chu Saikhawthlirah kan inkhawm a, chawhnu erawh chu Chuhvelah kan inkhawm thung a, Zamuang atangin 15km leh 9km a hla a ni. Inkhawm apiangin Lalpa zanriah a buatsaih nghal zel avangin darkar 24 pawh tling lovah ka u sacrament buatsaih vawi 3 ngawt ka chang thei a, vannei ka inti hle.

“Tumkau Ni – Mizoram Ni Pawimawh” ka tihna kher hi ka thiam ang tawkin kan sawifiah ve ang e.

Mizote hi mi chawimawi aia sawichhiat leh rel ching hnam niin mi tam takin an sawi thin. Mihring miziaah hian a tha lai aiin a chhe lai hmuh hi a awl a. Chuvangin, he ngaihdan pawh hi a dik mai thei a ni.

Chutiang a nih avang chuan mi tam tak hi chuan kan biak Lal Isua ngei pawh hi – kohhran activities tih lovah chuan – mi zingah hian kan fak mawlh mawlh khat hle. Khawlaia vakchhuak a, mi ina kal kual a, a mamawh apiang hnena Pathian thusawi tur chuan mi tam zawk hian kan thei lo a ni. Chuvangin, hetianga a huhova Lal Isua chawimawina ni bik Palm Sunday kan hmang hi Mizoram tan a tha a, kan hnam tan ni pawimawh tak a ni.

He ‘feh hawng thing pu’ thlalak hi Chite kawnga ka lak a ni a. Thing pu hi a in-fit em avangin kan kalsan thui thei mang lo a, kan fitness level a inthlau tih a chiang hle mai.

Thlalak hi uluk taka en chuan – f1.8 ka hman avangin – a fiah kuk lem lo va; fiah lai bik a awm thung. Tun hnaiah aperture hawng zau taka hetiang thlalak hi ka ching thar tlat. A pangngaiah chuan ni se aperture hi f8 vel emaw, chu aia te emaw pawh chu hman tur ni awm tak a ni.

***

Nikon D5000, AF-s 50mm f1.8G lens.

Camera Setting:
Aperture Priority – f1.8, ISO 200, 1/800s.
Spot Metering, Exposure Compensation -2/3,

Lightroom atangin Black & White-ah ka convert a; watermark khi Photoshop atangin ka dah thung. Thlalak black and white-a convert hian tlema contrast sang deuh hian dimension a highlight that avangin a tlangpuiin a dum tur lai hi ka ti dum deuh hlek a, chutiang bawkin a var lai pawh hi ka tivar uar deuh thin.

###

‘Light illuminates, shadows define’ – Rick Sammon-an a lo tih kha.

He khawngsir thingkung hnuaia in awm hi World Bank Road-a lung quarry bul a mi a ni a. He thlalak hi khaw thim dawn hnaih a nih tawh avangin duh angin a colour a mawi thei lo va, chuvangin ka black and white-in ka siam ta zawk a ni. Thingkung avang hian a tung zawngin ka la a. 50mm lens-a hetiang thlalak tum chu duh aia thui ‘back’ a ngai.

Aizawl veng hrang hrangah hian ‘thirdeng’ hi an tam tawh lo viauin ka ring. He thirdeng hi ITI Veng, Mualpui panna kawnga motor silna chhakah a awm a. Zing khawvar hlim atanga khaw thim hnu fe thleng hna an thawk thin. Ka kal lai hian mi pali/panga vel lai a lo chhawr.

Kohhran Hmeichhe Inkhawmpui Lian tiak ni, Pathianni (March 10, 2013)-ah chuan palaite leh a chhimtu mipuiten pandal an awhkhat hneh hle.

He khawmpui atan hian Synod-in pandal structure a neih chu hman a ni lo va, a aiah Central YMA pandal structure hawh a ni ta zawk a. Chuvangin, mi tam tak chuan pandal hi te an ti deuh a; amaherawhchu, Pathianni tih lovah hi chuan pandal hi vawikhat mah kan luah khat lo a ni.

Sunday zingah chuan inkhawm kal dan enin kan leng dawn lo tih a chiang a; ruahmanna awm sa, veng hrang hrang thuthleng lakkhawm pawhin a daih loh avangin theih ang angin Republic Vengthlang Kohhran Biak-in a mi thuthlengte usher-ten kan pu khawm a. Nectie leh kamis var nena thuthleng put chu a lum duh huam huam khawp mai.

Chawhma leh zanah kan usher a, zan lamah pawh chawhma a mi ang zat vel tho mipui an pungkhawm a; mahse vanneihthlak takin zan lamah boruak a dai nuam hle.

###
Thlalak lian zawk leh a description-te en turin thlalakah khian in click zauh dawn nia.